82 Surat Al-Infitar: Ang Pagkagun’ob.

82 Surat Al-Infitar: Ang Pagkagun’ob. [Kini nga surah gipadayag didto sa Makkah]

Sa ngalang ALLAH Ang Labing Madagayaon ug Ang Labing Maloloy’on.

1. Sa diha nga ang kalangitan manga-gun’ob,

2. ug ang kabitoonan manga katag,

3. ang mga lawod sa kadagatan maga-awas,

4. ang mga lubong manga-abli,

5. ug ang mga kalag mahibalo sa iyang kaniadto, maingon man sa paabuton,

6. Oh tawo, unsay naka-pahimo kanimo nga walay pag-amping sa imong Rab’bi nga Mapanalanginon?

7. Nga maoy naglalang kanimo, ug nag-himo kanimo nga sangkap ug naghatag kanimo sa kagawasan sa pag-pili?

8. Sa bisan unsang dagway nga IYANG Ginbut’an IYA ikaw nga gipa-angayan?

9. Apan dili! Ikaw nag-dumili sa katarung ug sa (Din) Paghukom?

10. Kay sa pagkamatood adunay mga nanag-bantay sa ibabaw ninyo.

11. nga Kiraman (pinasidung’gan) ug Katibin (magsusulat),

12. Nasayod sila sa tanan ninyong binuhatan.

13. Sa pagkamatood, sila nga mga matarong (Abrar) didto unya sa Na-im

14. Sa pagkamatood, sila (usab) nga mga Fuj’jar didto sa Hamim

15. ug sila magasulod human sa adlaw sa paghukom (Yawmid-Din)

16. ug sila didto walay katagoan.

17. Ug unsaon man ninyo sa pagkahibalo nga mao na ang Adlaw sa Paghukom?

18. Ug unya, unsaon ninyo sa pagkahibalo nga mao na ang Adlaw sa Paghukom?

19. Mao na kana ang adlaw, nga ang tawo wala nay gahom sa laing tawo, tungod kay ang tanang husay ug hukom IYA lamang (ni) ALLAH.

(Sa dili pa ulahi ang tanan, ang tawo angay nga mamalandong niining tanan nga mga dayag nga mahitabo didto sa panahon sa pagka-gun’ob. – Ang Yawmid-Din o Adlaw sa Paghukom maoy usa ka nabantog nga adlaw diin ang tanang binuhat (Malaikah, Jinn ug Tawo) magatambong sa usa ka labing dako nga husay, diin ang tanang napatik sa mga talaan paga-buklaron ug paga-hatagan ug husay sumala sa naabot sa matag-binuhat, ug kini pagahimoon uban ang katakos ug kaangayan ug walay usa nga paga-timbangon sa bisan diyot, apan sa hingpit nga kaangayan ug katarungan. Ang mapamatud’an nga naghimo ug dautan ug mamatay nga wala mag-usab, makaangkon sa silot, apan sila nga nagkinabuhi nga matarong maka-angkon sa ganti sa kahimayaan.)