78 Sura Naba: Ang Pahibalo.

78 Sura Naba: Ang Pahibalo. [Kini nga surah gipadayag didto sa Makkah]

Sa ngalang ALLAH Ang Labing Madagayaon ug Ang Labing Maloloy’on.

1. Bahin sa unsa nga sila nanag-lalis.

2. Mahitungod sa nabantog nga pahibalo;

3. Unsay wala nila gika-uyuni?

4. Sa pagkamatood, sila unya masayod!

5. Sa pagkamatood, Oo, sa pagka-matood sila masayod man niini!

6. Dili ba nga gihimo man NAMO ang yuta sa tuman nga kalapad;

7. Maingon man ang mga bukid ingon nga haligi?

8. Ug KAMI naglalang kaninyo nga adunay ka-tugbang?

9. Ug nga naghimo sa inyong katulugon ingon nga pahulay?

10. Ug naghimo sa gabii ingon nga tabon;

11. Ug naghimo usab kahayag, ingon nga panahon sa pag-panginabuhi?

12. Ug KAMI naglalang sa ibabaw ninyo sa pito ka mga malig’on nga kawanangan.

13. Ug didto niini nag-butang sa kahayag nga labing masidlak.

14. Ug KAMI nagpa-kanaug ug tubig gikan sa panganod, nga hilabihan kadagaya.

15. Ug aron KAMI magpagula sa mga utanon ug mga uhay;

16. Maingon man sa mga tanaman nga malabong;

17. Sa pagkamatood ang adlaw sa pag-pihig natagal nang daan.

18. Sa adlaw diin ang Suri pagahuypon, ug kamo maga-duol nga magapanon;

19. Ug ang mga kawanangan, paga-ablihan ingon sa mga gang-ha’an;

20. Ug ang mga bukid manga-wagtang, sila sa ingon manga-hanaw.

21. Sa pagkamatood, ang Jahan’nam naga-paabot;

22. Sa mga malinapason, maoy dapit nga padulngan.

23. Ug sila didto maga-puyo sa mga katuigan;

24. Didto, wala silay matilawan nga kabugnaw nga ilimnon:

25. Gawas sa nagbukal nga tubig, ma-itom, mahugaw, ug ngilo ang kabugnaw;

26. Kini maoy angayan nga ipahamtang kanila.

27. Tungod kay sila walay kahadlok sa dakong husay;

28. Ug nga sa AMONG mga Ayah nag-panghimakak.

29. Apan ang tanan nga mga butang AMO nga gisulat ug gitipigan sa usa ka Kitab.

30. Busa antusa ninyo! tungod kay KAMI dili maga-dugang, gawas sa inyong kastigo!

31. Sa pagkamatood, alang sa mga matarong, adunay katagbawan sa mga handom;

32. Mahimayaong mga tanom, ug mga tanaman sa mga ubas;

33. Ipon niadtong mga batan’ong ma-nag-sama ang panuigon;

34. Maingon man ang mga tagayan nga puno sa kaputli.

35. Sila, didto dili makadungog, sa mga kalaw’ayan ni kakawangan.

36. Mao kiniy gasa gikan sa inyong Rab’bi, sumala sa ihap.

37. Nga maoy Rab’bi sa mga kalangitan, ug kalibutan ug sa mga anaa sa taliwala niini. Ang Labing Maloloy’on nga KANIYA walay gahom nga maka-buntog.

38. Sa adlaw nga ang mga Ruh ug ang mga Malaikah maga-tindog nga maga-laray sumala sa ilang mga han-ay; Kanila walay magalitok gawas sa mga gitugutan sa Labing Maloloy’on, ug sila maga-sulti kon unsay tinood.

39. Mao kana ang adlaw sa kamatooran, busa ang naha-gugma, padangpa siya sa iyang Rab’bi!

40. Sa pagkamatood, KAMI nag-pahibalo kaninyo sa naga-kahiduol nga silot; Sa adlaw nga ang tawo, maka-ila sa tanan nga buhat sa iyang mga kamot. Ug ang mga Kafir, maga-ingon; “Alaut ako! Labi pang maayo nga ako nahimong abog!”

(Niini gihulagway ang kinaiya ug husay sa mga dautan maingon man ang silot nga angay kanila apan lahi niini, ang mga matarong kansang ganti dili matukib ug walay sama nga mga kadagaya sa kahimayaon nga kahimtang sa kaluwasan. Mao kini ang kahingpitan sa nabantog nga pahibalo alang sa tanang tawo nga adunay panabot ug panlantaw nga ang kinabuhi niini nga yuta sama lamang sa dula-dula ug dili malungtaron, sanglit ang matood nga kinabuhi nga maoy matood nga tumong sa matag tumuloo mao ang kinabuhi didto sa Akhira luyo sa kamatayon. Ug mao kini ang lunsay ug bug’os nga kalab’uton sa matag (tumuloo) tawo dinhi sa ibabaw sa yuta.)