81 Surat At-Takwir: Ang Pag-ngit’ngit.

81 Surat At-Takwir: Ang Pag-ngit’ngit. [Kini nga surah gipadayag didto sa Makkah]

Sa ngalang ALLAH Ang Labing Madagayaon ug Ang Labing Maloloy’on.

1. Sa diha nga ang adlaw, paga-tabunan na,

2. ug ang mga bitoon mapalong na,

3. ang mga bukid manga-hanaw na,

4. ang mga kamelyo kalimtan na,

5. ang mga ihalas nga mananap mang-gula na,

6. ug ang dagat maga-awas na,

7. ang mga kalag hiusahon na,

8. ang mga batang gilubong nga buhi mapangutana na,

9. sa unsang sala sila gipatay,

10. Oo, ang mga talaan paga-buklaron na,

11. ug ang kalangitan bungkagon na,

12. ug ang mga Jahim dagkutan na,

13. ug ang Jan’nah ipaduol na,

14. nan, unya ang matag kalag masayod na sa iyang umalabot;

15. (Gipanumpa Ko) Pinaagi sa kabitoonan nga mangahanaw,

16. sa mga nanag-subay sa ilang mga dalan, apan mangawagtang.

17. sa gabii nga mawala,

18. sa banag-banag nga maga-wagtang sa kangitngit.

19. Sa pagkamatood mao kini ang gipa-batbat sa Rasul nga Karim,

20. nga tinugahan sa gahum, uban sa nanag-laray sa ubos, sa Rab’bi sa Arsh.

21. Nga angayang tumanon, tungod kay sa tugon labing matinumanon ug kasaligan.

22. (Oh Katawhan) ang inyong kuyog, wala maliso-i sa maayong pangisip,

23. ug sa walay duha-duha, nakita niya (Muhammad), siya (Jibril) nga dayag sa hataas nga dapit.

24. kay bisan pa sa mga tinago, siya niini wala mag-hikaw sa pag-butyag.

25. Ug kay kini dili pulong ni Shaytan nga tinunglo!

26. Busa karon, hain ka padulong?

27. Sa pagkamatood kini pahinumdom sa tanang binuhat sa tanang kalibutan.

28. Maingon man kaninyo nga nanag-tinguha sa paglakaw nga matul’id,

29. Apan dili kamo makabuot, gawas kon kini pag-buot (ni) ALLAH nga maoy Rab’bi sa tanang Alam!

(Mao kini ang nabantog nga panahon sa tuman nga kangitngit diin ang siga sa adlaw mapalong na, ug wala nay kahayag sa tibook kawanangan. – Mao kini ang hingpit nga pahinumdom sa tanang tawo nga adunay pagpamalandong.)